کماد کا پیداواری منصوبہ

کماد ایک اہم نقد آور فصل ہےجو ہمارے ہاں گندم اور کپاس کے بعد سب سے زیادہ رقبہ پر کاشت ہوتی ہے۔بڑھتی ہوئی آبادی کی چینی، گڑ اور شکر وغیرہ کی ضروریات پوری کرنے کے لیے اور گنے کی فصل کو مزید منافہ بخش بنانے کے لیے اس کی فی ایکڑ پیداوار میں اضافہ نہایت ضروری ہے۔کماد کی جدید پیداواری ٹیکنالوجی اپنا کر اس کی فی ایکڑ پیداوار میں اضافہ کیا جا سکتا ہے۔اس لیے ضروری ہے کہ زیادہ پیداوار دینے والی سفارش کردہ اقسام کی کاشت، شرح بیج، طریقہ کاشت، وقت کاشت، کھادوں کا متناسب اور بروقت استعمال، بروقت آبپاشی، فصل کی بیماریوں ،نقصان دہ کیڑوں اور جڑی بوٹیوں کے موئثر انسداد پر بھرپور توجہ دی جائے۔

وقت کاشت:

بہاریہ کاشت: کماد کی بہاریہ کاشت کا موزوں وقت 15 فروری سے آخر مارچ تک ہے۔
ستمبر کاشت: ستمبر کاشت کے لیے موزوں وقت یکم ستمبر تا 15 اکتوبر ہے۔

سفارش کردہ اقسام

• اگیتی پکنے والی اقسام

سی پی 400-77 ، سی پی ایف - 237 ، ایچ ایس ایف - 242 ہی پی ایف - 250 اور سی پی ایف - 251

• درمیانی پکنے والی اقسام

ایچ ایس ایف 240 ، ایس پی ایف 234 ، ایس پی ایف 213 ہی پی ایف 246 ہی پی ایف 247 ، سی پی ایف 248 ہی پی ایف 249 ہی پی ایف 253 ہی پی ایس جی - 2525 اور ایس ایل ایس جی - 1283

• پچھیتی پکنے والی قسم

سی پی ایف 252

نوٹ: ایچ ایس ایف 240 کانگیاری سے متاثر ہوتی ہے اس لیے متاثرہ فصل کی مونڈھی نہ رکھیں ۔

یاد رکھیں: ایچ ایس ایف 240- کانگیاری سے متاثر ہوتی ہے، اس لیے متاثرہ فصل کی مونڈھی نہ رکھیں، اور بیج صحت مند فصل سے حاصل کریں۔ ایس پی ایف-234 رتہ روگ سے زیادہ متاثر ہوتی ہے لہذا اسکی کاشت کم سے کم کریں۔اور مونڈھی فصل رکھنے سے اجتناب کریں۔

کماد کی سفارش کردہ اقسام بلحاظ علاقہ جات

نام قسم	سفارش کردہ علاقہ جات	دیگر خصو صیات
ایچ ایس ایف 242-،ایچ ایس ایف 240	پنجاب کے تمام اضلاع دریائی علاقہ جات، خیبر پختونخواہ	پکنے میں درمیانی، اچھی نشوونما، مونڈھی رکھنے کی اوسط صلاحیت، فصل کےنہ گرنے کی صلاحیت
ایس پی ایف 234-	جنوبی پنجاب کے اضلاع ما سوائے دریائی علاقہ جات(صرف راجن پور، بہاولپور اور رحیم یار خان کے علاقاجات کے لئے)	پکنے میں درمیانی، مونڈھی رکھنے کی اچھی صلاحیت، رتا روگ کے خلاف کم قوت مدافعت، فصل کے نہ گرنے کی صلاحیت
سی۔پی 77400	پنجاب کے تمام اضلاع بشمول دریائی علاقاجات، خیبر پختونخواہ، سندھ	پکنے میں اگیتی، اچھی نشونما، موڈی رکھنے کی اچھی صلاحیت، بیماریوں اور کیڑوں کے خلاف قوت
مردان 93۔سی پی 51.21،	خیبر پختونخواہ	پکنے میں درمیانی، اچھی نشوونما، مونڈھی رکھنے کی اوسط صلاحیت، فصل کےنہ گرنے کی صلاحیت
بی ایف 129، لاڑکانہ 2001، سی پی ایف 237، ڈسکو، سی پی ایف 67.412	لوئر سندھ، اپر سندھ

شرح بیج :

کماد کی کاشت کے لیے 2 آنکھوں والے 30 ہزار یا 3 آنکھوں والے 20 ہزار سمے یعنی 60 ہزار آنکھیں فی ایکڑ استعمال کریں۔ سموں کی یہ تعداد تقریبا 100 تا 120 من کماد سے حاصل ہوتی ہے اور اس کے لیے 12 تا 16 مرلہ کماد درکار ہوتا ہے۔اس شرح بیج سے اوسط تقریبا 800سے 1000 من فی ایکڑ پیداوار حاصل کی جاسکتی ہے۔

بیج کو پھپھوندی کش زہر لگانا:

سموں کو کاشت سے پہلے 5 منٹ کے لیے تھائیو فینیٹ میتھائل 70% ڈبلیو پی کے محلول میں ڈبو کر کاشت کریں۔

بیج کا انتخاب و تیاری:

کماد کے اچھے بیج کے انتخاب کے لئے درج ذیل عوامل کا خیال رکھیں ۔

• ہمیشہ صحت مند فصل سے بیج کا انتخاب کریں۔ خاص طور پر ایسے کھیت سے ہر گز بیج نہ لیں جس میں رتہ روگ کی بیماری موجود ہو اور بیج بناتے وقت بیمار اور کمزور گنے چھانٹ کر نکال دیں۔
• زیادہ بہتر ہے کہ بیج کے لیے الگ سے نرسری کاشت کریں اور اس کو بیماریوں و کیڑوں سے مکمل طور پر بچائیں۔
• بیج لیری فصل سے منتخب کریں البتہ ستمبر کاشتہ فصل کے لئے مونڈھی فصل کا بیج بھی استعمال کیا جا سکتا ہے۔
• بیج کے لئے گنے کا اوپر والا حصہ استعمال کریں اور نیچے والا حصہ مل کو بیج دیں۔
• کماد کی گری ہوئی فصل سے بیج کا انتخاب نہ کریں۔ سموں (Sets) پر کھوری یا سبز پتوں کا غلاف نہیں ہونا چاہیے ورنہ اُگاؤ متاثر ہوتا ہے اور دیمک لگنے کا بھی احتمال رہتا ہے۔
• سموں کی آنکھوں کو زخمی ہونے سے بچانے کے لیے گنے کو درانتی وغیرہ سے چھیلنے کی بجائے ہاتھوں سے کھوری اتاریں۔ بار برداری کے دوران بھی احتیاط کریں۔
• بیج تیار کرنے کے بعد بوائی میں تا خیر نہ کریں۔ اگر کسی وجہ سے دیر ہو جائے تو بیج کو کھوری سے ڈھانپ کر رکھیں اور اس پر وقفے وقفے سے پانی چھڑکتے رہیں تا کہ یہ خشک نہ ہو۔
• کورے سے متاثرہ فصل سے بیج منتخب نہ کریں۔

کماد کی کاشت کے لیے زمین کا انتخاب اور تیاری:

کماد کی بھرپور پیداوار کے لیے بھاری میرا زمین جس میں پانی کا نکاس اچھا ہو، موزوں ہے۔ البتہ میرا اور ہلکی میرا زمین پر بھی اس کی کاشت کی جا سکتی ہے، بشرطیکہ حسب ضرورت پانی دستیاب ہو۔ شور زدہ اور کلر والی زمین کماد کی کاشت کے لیے موزوں نہیں ہے۔ کاشت سے پہلے زمین کو خوب بھر بھرا کر لیں، اس مقصد کے لیے پہلے روٹا ویٹر چلا کر پچھلی فصل کی باقیات کو زمین میں ملا دیں اور پھر ایک مرتبہ مٹی پلٹنے والا ہل چلائیں۔ زیادہ گہری کھیلیاں بنانے کے لیے ایک دفعہ سب سائیلر چلائیں۔ اس کے بعد زمین کو ہموار کر لیں، اور 3 سے 4 دفعہ عام ہل چلائیں۔

طریقہ کاشت:

گہری کھیلیوں میں کاشت:

رجر کی مدد سے 10تا 12 انچ گہری کھیلیاں بنائیں، اور سموں کی دو لائنیں 8 سے9 انچ کے فاصلے پر اس طرح لگائیں کہ ان کے سرے آپس میں ملے ہوئے ہوں۔ سموں کے اوپر سفارش کردہ کھادیں اور دانے دار زہریں ڈالیں اور ان کو مٹی کی ہلکی سے تہہ سے ڈھانپ دیں۔

کھلے سیاڑوں میں کاشت:

اس مقصد کے لیے 3 فٹ کی کشادہ پٹیاں بنائیں اور ہر پٹی میں سموں کی دو قطاریں لگائیں، واضح رہے کہ قطاروں کا درمیانی فاصلہ 1 فٹ تک ہونا چاہیے۔ سموں کے اوپر سفارش کردہ دانے دار زہریں ڈالیں اور مٹی کی ہلکی سی تہہ چڑھا دیں۔

گڑھوں میں کاشت:

اس طریقہ کاشت میں ایک فٹ گہرائی کے گڑھے کھودیں، اور سموں کو گڑھے میں ترتیب دینے کے بعد گڑھوں کو سطح زمین کے برابر مٹی سے بھر دیں۔

نوٹ: گڑھوں میں مٹی کی بھرائی سے پہلے گوبر کی گلی سڑی کھاد یا کیمیائی کھاد ملا دینے سے پودوں کی بڑھوتری میں خاطر خواہ اضافہ ہوتا ہے۔

شوگر کین پلانٹر:

شوگر کین پلانٹر کی مدد سے ایک گھنٹے میں ایک ایکڑ گنا کاشت کیا جا سکتا ہے۔ پلانٹر کی مدد سے کاشتہ کماد کا اگاؤ یکساں ہوتا ہے اور پیداوار میں دو سو سے تین سو من تک اضافہ ہوتا ہے۔

آبپاشی کے اہم مراحل:

سالانہ بارش کا عنصر نکال کر کماد کی فصل میں 16 تا 20 مرتبہ آبپاشی کی ضرورت ہوتی ہے۔پانی کی کمی پیداوار پر برا اثر ڈالتی ہے۔

سال کے مختلف مہینوں میں کماد کے لیے آبپاشی کا وقفہ

ماہ	تعداد آبپاشی	وقفہ برائے آبپاشی
مارچ – اپریل	3-2	20 تا 30 دن
مئی - جون	6-5	10 تا 12 دن
جولائی -اگست	4-3	15 تا 20 دن
ستمبر - اکتوبر	3-2	20 تا 30 دن
نومبر - فروری	4	30 دن
کل پانی	16 سے 20

کماد کی نشوونما کی حالتیں:

کماد کی فصل کی بہترین مینییجمنٹ اور بھر پور پیداوار لینےکےلئےفصل کا پیداواری مرحلہ جاننا ضروری ہے۔

بھرپور بڑھوتری کا مرحلہ GRAND GROWTH PHASE

• یہ مرحلہ 120 دنوں سے شروع ہو کر 270 دن تک جاری رہتا ہے
• سازگار ماحول میں گنے کا تنا ایک مہینے میں 4 سے 5 پوریاں بناتا ہے
• بڑھوتری کے اس مرحلے میں گنے کی لمبائی اور پیداوار کا فیصلہ ہوتا ہے
• بڑھوتری کے اس مرحلے کے لئے 30ڈگری درجہ حرارت اور 80 فیصد نمی موزوں ہوتی ہے۔
• صرف 15-20فیصد مکمل گنے بنتے ہیں

گناپکنے کا مرحلہ(RIPENING PHASE)

• یہ مرحلہ 270 دنوں سے شروع ہو کر 360 دنوں تک جاری رہتا ہے۔
• اس مرحلہ میں گنے کی بڑھوتری کا عمل کم ہو جاتا ہےا ور مٹھاس بڑھنے کا عمل شروع ہو جاتا ہے
• گنا سادہ شوگرز کو کمپلیکس شوگرز میں تبدیل کرتا ہے۔
• گنے کے درمیانے حصے میں شوگرز زیادہ جب کہ چوٹی اور نیچے والے حصے میں کم ہوتی ہے۔
• اس مرحلے میں دن کے وقت زیادہ سورج کی روشنی اور رات کے وقت کم درجہ حرارت کی ضرورت ہوتی ہے۔

کھادوں کے متعلق ہدایات:

کماد کی فی ایکڑ اچھی پیداوار کے حصول اور سفارش کردہ کھادوں کی صحیح مقدار کا تعین کرنے کے لئے زمین کا تجزیہ کروانا ضروری ہے۔گروٹیک کسانوں کو اپنی زمین کا تجزیہ کروانے کی سفارش کرتا ہے۔ تا کہ کم لاگت میں بہترین پیداوار کا حصول ممکن ہو سکے۔

زمین کی زرخیزی کے لحاظ سے کماد کی فصل کے لیے کھادوں کی سفارشات

زمین کی زرخیزی	مقدار غذائی اجزائ (کلو گرام فی ایکڑ)
کمزور زمین:نامیاتی مادہ 0.87% سے کم،فاسفورس 7 پی پی ایم سے کم اور پوٹاش 80 پی پی ایم سے کم ہوتا ہے۔	120 کلو گرام نائٹروجن فی ایکڑ 69 کلو گرام فاسفورس فی ایکڑ 50 کلو گرام پوٹاش فی ایکڑ
درمیانی زمین: نامیاتی مادہ 0.87% تا 1.29% ، فاسفورس 7 تا 14 پی پی ایم، اور پوٹاش 80 تا 180 پی پی ایم ہوتا ہے۔	103 کلو گرام نائٹروجن فی ایکڑ 57 کلو گرام فاسفورس فی ایکڑ 50 کلو گرام پوٹاش فی ایکڑ
زرخیز زمین: نامیاتی مادہ 1.29% سے زائد، فاسفورس 14 پی پی ایم سے زائد اور پوٹاش 180 پی پی ایم سے زائد ہوتا ہے۔	87 کلو گرام نائٹروجن فی ایکڑ 46 کلو گرام فاسفورس فی ایکڑ 50 کلو گرام پوٹاش فی ایکڑ

زمین کی زرخیزی کے لحاظ سے کماد کی مونڈھی فصل کے لیے کھادوں کی سفارشات

زمین کی زرخیزی	مقدار غذائی اجزائ (کلو گرام فی ایکڑ)
کمزور زمین:نامیاتی مادہ 0.87% سے کم،فاسفورس 7 پی پی ایم سے کم اور پوٹاش 80 پی پی ایم سے کم ہوتا ہے۔	156 کلو گرام نائٹروجن فی ایکڑ 69 کلو گرام فاسفورس فی ایکڑ 50 کلو گرام پوٹاش فی ایکڑ
درمیانی زمین: نامیاتی مادہ 0.87% تا 1.29% ، فاسفورس 7 تا 14 پی پی ایم، اور پوٹاش 80 تا 180 پی پی ایم ہوتا ہے۔	134 کلو گرام نائٹروجن فی ایکڑ 57 کلو گرام فاسفورس فی ایکڑ 50کلو گرام پوٹاش فی ایکڑ
زرخیز زمین: نامیاتی مادہ 1.29% سے زائد، فاسفورس 14 پی پی ایم سے زائد اور پوٹاش 180 پی پی ایم سے زائد ہوتا ہے۔	113 کلو گرام نائٹروجن فی ایکڑ 46 کلو گرام فاسفورس فی ایکڑ 50 کلو گرام پوٹاش فی ایکڑ

بی۔او۔پی کا استعمال

• بی۔او۔پی یعنی بائیو آرگینو فاسفیٹ بھی فاسفورسی کھادوں کا اچھا ذریعہ ہے۔ جس میں 20 فیصد فاسفورس کے ساتھ ساتھ 15 فیصد نامیاتی مادہ اور کروڑوں فاسفورس حل کرنے والے بیکٹیریا شامل ہوتے ہیں۔
• پودوں کے لئے 90 دن تک فاسفورس کی فراہمی کے ساتھ ساتھ زمین میں موجود منجمد فاسفورس کو بھی حل پذیر بناتی ہے۔جس سے پیداوار میں اضافہ ہوتا ہے۔
• ڈی۔اے۔پی کی فی ایکڑ مقدار آدھی کم کر کے 2 بیگ بی۔او۔پی بیجائی کے وقت استعمال کریں۔

پوٹاشیم ہیومیٹ کا استعمال گنے کی پیداوار میں خاطر خواہ اضافہ کا باعث بنتا ہے۔بڑھوتری کے عمل کو تیز کرتا ہے۔فصل کو سرسبز و شاداب بناتا ہے۔جڑیں گھنی اور بہتر پرورش پاتی ہیں۔مدافعتی نظام میں بہتری لاتا ہے۔زمین کی پی ایچ کو فصل دوست بنائے، مائیکرو نیوٹرینٹس کو چیلیٹ کرے، زمین کو نرم اور بھربھرا بناتا ہے۔ کھادوں کی افادیت میں اضافہ کرتا ہے۔ کماد کے شگوفوں کی تعداد میں اضافہ کرتا ہے۔

اجزائے صغیرہ کا استعمال

جب فصل تقریبا 1.5 سے 2 ماہ کی ہو جائے تو 8 کلو زنک 27 فیصد والا اور 5 کلو میگنیشیم پانی کے ساتھ فلڈ کر دیں، اس سے گنے کے وزن میں اضافہ ہوتا ہے اور فصل کے گرنے کے امکانات کم ہو جاتے ہیں۔ زنک کے استعمال سے مل بھیجنے والےگنوں کی تعداد میں اضافہ ہوتا ہے۔

نوٹ: مندرجہ بالا سفارشات نامیاتی مادہ اور غذائی اجزائ کی مقدار کے لحاظ سے ہیں۔ گروٹیک آپ کے رقبے میں زمین کی زرخیزی کے لحاظ سے ہر کھیت کے اندر مختلف مقدار میں کھادوں کی سفارش کرتی ہے، تا کہ فصل کی بھرپور پیداوار حاصل کی جا سکے۔

اوسط درجے کی زمینوں کے لئے کھادوں کی سفارشات اور وقت استعمال

وقت استعمال		فاسفورس	نائٹروجن	پوٹاش	نامیاتی مادہ	زنک
زمین کی تیاری(بیجائی کے وقت)		1.5 بوری ڈی-اے-پی+2 بیگ بی-او-پی یا 2.5 بوری ڈی-اے-پی
اگاؤکے بعد	بیجائی کے 45 دن بعد		1 بیگ یوریا			8 کلو زنک سلفیٹ 27 فیصد یا 10 لیٹر زنک 10 فیصد
	بیجائی کے 75 دن بعد		1 بیگ یوریا		10 لیٹر پوٹاشیم ہیومیٹ
	بیجائی کے140 دن بعد		25 کلو یوریا	12.5 کلو پوٹاشیم سلفیٹ یا 10 لیٹر پوٹاش 30 فیصد
	بیجائی کے 180 دن بعد		1 بیگ یوریا
	بیجائی کے 210 دن بعد		1 بیگ یوریا

مونڈھی فصل کی صورت میں (نائٹروجنی) کھادوں کا استعمال لیرا فصل کی نسبت 25-30 فیصد زیادہ کریں۔

پوٹاش کی اہمیت:

• زمین کی ساخت کو بہتر بنا کر گنے کی جڑوں کی کارکردگی میں اضافہ کرے۔
• زمینی بیماریوں سے پودوں کو محفوظ بنا کر گنے کی بڑھوتری میں شاندار اضافہ کرے۔
• خوراک کی پتوں سے گنے میں منتقلی کرے۔
• گنے کے سائز میں اضافہ کرکے موٹا اور صحت مند بنائے۔
• گنے کے معیار اور مقدار میں اضافہ کرکے مٹھاس میں اضافہ کرے۔

مونڈھی فصل کے لئے کھیت کا چناؤ

جس کھیت میں بیماری اور حشرات کا حملہ ہو اس کو مونڈھی رکھنے کے لیے ہرگز منتخب نہ کریں۔ مزید بر آں گری ہوئی فصل کو آئندہ کے لیے مونڈھی نہ رکھیں۔موںڈھی فصل میں جہاں ناغے ہوں انہیں لازمی پر کریں۔

مونڈھی رکھنے کا وقت: آخر جنوری سے شروع مارچ تک کا وقت کماد کی مونڈھی فصل رکھنے کے لیے نہایت موزوں ہے۔ اس وقت رکھی مونڈھی فصل سے شگوفے خوب پھوٹتے ہیں اور پودے اچھا جھاڑ بناتے ہیں۔ نومبر، دسمبر اور شروع جنوری میں رکھی گئی مونڈھی زیادہ جھاڑ نہیں بناتی ،کیونکہ سردی کی شدت کی وجہ سے مڈھوں میں پوشیدہ آنکھیں مر جاتی ہیں۔

کماد کی اہم جڑی بوٹیاں اور ان کا تدارک

کماد کی بہاریہ فصل میں باتھو، بلی بوٹی، جنگلی چولائی، جنگلی پالک، جنگلی ہالوں ، کرنڈ ، اٹ سٹ ، مورک، کا را با را، ڈیلا، کھبل، نڑو، قلفہ، گاجر بوٹی، سینجی اور لہلی جبکہ ستمبر کاشتہ فصل میں اٹ سٹ، ڈیلا، جنگلی سوانک، ڈھڈن ،لومڑ گھاس، ماکڑو، مدھانہ، ہزار دانی ، سوانکی، تاندلہ، قلفہ اور چولائی وغیر ہ اگتی ہیں ۔ اچھی پیداوار حاصل کرنے کے لئے جڑی بوٹیوں کی تلفی انتہائی ضروری ہے ۔ ایک اندازے کے مطابق جڑی بوٹیوں کی وجہ سے کماد کی پیداوار 25 فیصد تک کم ہو سکتی ہے ۔ جڑی بوٹیوں کی تلفی درج ذیل طریقوں سے کی جا سکتی ہے۔

گوڈی
فصلوں کا ادل بدل
کیمیائی انسداد

کیمیائی انسداد

اگاؤ سے پہلے سپرے:

کماد کی کاشت کے ایک تا دو دن بعد وتر حالت میں ایس میٹولا کلور 960 ای سی بحساب 1000 ملی لٹر یا میز وٹرائی اون + ایٹرازین 50 ڈبلیو پی بحساب 1000 گرام یا ایکلونی فن 500 ملی لٹر فی ایکڑ یا ان کے متبادل زہر سپرے کی جاسکتی ہیں ، یہ زہر یں بیشتر موسمی جڑی بوٹیاں تلف کردیتی ہیں اور اکثر دوسرا سپرے کرنے کی ضرورت باقی نہیں رہتی۔ لیکن بعض صورتوں میں سپرے کے باوجود ڈیلا کافی حد تک بچ جاتا ہے جسے تلف کرنے کے لئے دوسری مرتبہ سپرے کی ضرورت درپیش ہو سکتی ہے۔ڈیلا تلف کرنے کے لئے کماد کاشت کرنے کے ڈیڑھ ماہ بعد ہالوسلفیوران 80 ڈبلیو ڈی جی بحساب 20 گرام فی ایکڑ سولٹر پانی ملا کر سپرے کی جائے۔ جب فصل 65 دن کی ہو جاۓ تو اس میں ہل یا ملٹی روٹری و یڈر یا چھوٹا روٹا ویٹر چلایا جائے اور 100 تا 110 دن کی ہونے پرمٹی چڑھادی جاۓ تو بیشتر جڑی بوٹیوں کی تلفی کا عمل مکمل ہو جاتا ہے ۔

نوٹ:

کماد کی فصل میں جڑی بوٹیوں کے بہترین کنٹرول کے لئے پانی کی فی ایکڑ مقدار 120-160 لیٹر رکھیں۔یاد رہے مکمل کنٹرول کے لئے جڑی بوٹیوں کا تر ہونا ضروری ہے ۔ سپرے تر وتر میں کریں اور صاف پانی کا استعمال کریں۔ سپرے ہمیشہ ٹی۔جیٹ نوزل سے کریں۔ بہتر نتائج حاصل کرنے کے لیے ضروری ہے کہ سپرے کرنے کے ایک ہفتہ بعد آبپاشی کر دی جائے۔

جڑی بوٹیاں	نام زہر	وقت استعمال	مقدار فی ایکڑ	طریقہ استعمال
چوڑے پتوں والی جڑی بوٹیاں	ایس میٹولاکلور 96 فیصد	اگاؤ سے پہلے	800ملی لیٹر	بیجائی کے بعد 24 گھنٹے کے اندر سپرے کریں یا فلڈ کریں۔
چوڑے و نوکیلےپتوں والی جڑی بوٹیاں	ایٹرازین 38 فیصد+اسیٹوکلور 50 فیصد	اگاؤ سے پہلے	500 ملی لیٹر+500 ملی لیٹر	بیجائی کے بعد 24 گھنٹے کے اندر سپرے کریں
چوڑے و نوکیلےپتوں والی جڑی بوٹیاں	ایٹرازین+ میزوٹرائی اون +پروپیسسوکلور 33.5 فیصد	اگاؤ کے بعد	1500 ملی لیٹر	جڑی بوٹیوں کی 2 سے 4 پتوں کی حالت
چوڑے و نوکیلے پتوں والی جڑی بوٹیاں	ایٹرازین+ میزوٹرائی اون 50 فیصد	اگاؤ کے بعد	1000 سے 1200 گرام	جڑی بوٹیوں کی 2 سے 4 پتوں کی حالت
چوڑے و نوکیلے پتوں والی جڑی بوٹیاں	ایٹرازین+ میزوٹرائی اون 55 فیصد	اگاؤ کے بعد	1500-2000 ملی لیٹر	جڑی بوٹیوں کی 2 سے 4 پتوں کی حالت
چوڑے و نوکیلے پتوں والی جڑی بوٹیاں+ڈیلا	ایٹرازین+ میزوٹرائی اون +ہیلوسلفوران 58 فیصد	اگاؤ کے بعد	1000 گرام فی ایکڑ	جڑی بوٹیوں کی 2 سے 4 پتوں کی حالت
چوڑے و نوکیلے پتوں والی جڑی بوٹیاں+ڈیلا	میزوٹرائی اون + ایٹرازین +ہالو سلفیوران میتھائل 80 ڈبلیو ڈی جی	اگاؤ کے بعد	500-750 گرام فی ایکڑ	جڑی بوٹیوں کی 2 سے 4 پتوں کی حالت

غذائی عناصر کی کمی کی علامات

نائٹروجن:

فاسفورس:

پوٹاش:

بوران:

زنک:

کماد کے نقصان دہ کیڑے اور ان کا انسداد

دیمک (Termites)

سیاہ بگ (Black Bug)

گھوڑ امکھی (Sugarcane Pyrilla)

کماد کی سفید مکھی (Sugarcane whitefly)

سرخ مائٹس (Red Mites)

سفید مائٹس(White Mites)

کماد کی گلابی گدھیڑی (Sugarcane Pink mealybug)

ابتدائی تنے کا گڑ وواں

چوٹی کا گڑ وواں (Top Borer)

تنے کا گڑ وواں (Stem Borer)

جڑ کا گڑوواں (Root Borer)

گورداسپوری گڑ وواں (Gurdaspur Borer)

نقصان دہ کیڑے	کیمیائی کنٹرول	مقدار فی ایکڑ	طریقہ استعمال
دیمک، تنے کی ابتدائی سنڈیاں	فیپرونل 0.4 فیصد	12 کلوگرام	بیجائی کے وقت لائینوں میں کیرا کریں
	کاربوفیوران 3 فیصد	16 کلوگرام	بیجائی کے وقت لائینوں میں کیرا کریں
	فیپرونل+ایمامیکٹن 0.35 فیصد	8 کلو گرام	بیجائی کے وقت لائینوں میں کیرا کریں
	کلور ینٹرا نیلی پرول + تھایا میتھا کسم 0.6 فیصد	3-6 کلوگرام	بیجائی کے وقت لائینوں میں کیرا کریں اگاو کے بعد چھٹہ بھی کیا جا سکتا ہے۔
تنے کی سنڈیاں(بوررز)	کلورانٹرانیلی پرول 20 فیصد	100-150 ملی لیٹر	نوزل کھول کر ڈرینچنگ کریں۔
	فیپرونل 5 فیصد یا فپرونل 80 فیصد	960 ملی لیٹر یا 60 گرام فی ایکڑ	بزریعہ آبپاشی فلڈ کریں
تنے کی سنڈیاں(بوررز)،گھوڑا مکھی،سفید مکھی	کلورپائیریفاس 40 فیصد	2000 لیٹر فی ایکڑ	بزریعہ آبپاشی فلڈ کریں
سیاہ بگ	کلوتھیانیڈن 20 فیصد	150-200 ملی لیٹر	ٹی۔جیٹ نوزل استعمال کر کے اسپرے کریں۔ ہفتے بعد اسپرے دہرائیں۔
	امیڈا کلوپرڈ+فیپرونل 80 فیصد یا لیمبڈا سائیہلوتھرین2.5 فیصد	60 گرام فی ایکڑ یا 400 ملی لیٹر

نوٹ : گڑووں کے انسداد کے لیے ہر 30 دن کے وقفے سے 30 جولائی تک زہر پاشی کرتے رہیں۔تنے کی سنڈی ، ملی بگ ،سفید مکھی کے کنٹرول کے لئے کلورپائریفاس کے ساتھ 30 گولیاں فینائیل کی فلڈ کریں۔

تنے کی سنڈیوں اور دیمک کے انسداد کے لئے کلورو پائری فاسEC-40 بحساب 1250 ملی لٹر یا فیپرونل ڈبلیو ڈی جی 80 فیصد بحساب 30 گرام یا امیڈ اکلوپرڈ + فیپر ونل80 فیصد بحساب 100 گرام فی ایکٹر بوائی کے وقت سموں پر سپرے کر دیں ۔

کماد کی بیماریاں اور ان کا تدارک

رتاروگ (Red Rot)

کانگیاری (Whip Smut)

چوٹی کی سڑانڈ (Pokkah Boeng)

کمادکی برگی دھاریاں (Red Stripe)

کنگی (Rust)

کماد کی سفید پتوں والی بیماریاں (White Leaf Disease of Sugarcane)

کماد کی سفید پتوں والی بیماری خطرناک ہے۔ جو ایک خاص قسم کے جرثومہ سے پھیلتی ہے جو پودے کے اندرونی نظام میں چلا جاتا ہے اور خوراک بنانے کے عمل پر اثر انداز ہوتا ہے۔ پتوں کا سبر مادہ ختم ہو جاتا ہے اور پیداوار کم ہو جاتی ہے۔ گذشتہ دو سالوں سے سندھ کے کئی علاقوں میں اس بیماری کا حملہ خطر ناک حد تک بڑھ گیا ہے ۔ صوبہ پنجاب میں اس بیماری کا حملہ ابھی کم ہے لیکن مستقبل میں اس کے امکانات کو ردنہیں کیا جا سکتا۔ اس لیے مستقل منصوبہ بندی اور ممکنہ احتیاطی تدابیر اختیار کرنا ضروری ہے تا کہ فصل کو اس کے مضر اثرات سے بچایا جا سکے۔

علامات:

1. متاثرہ پودے کے پتے بالکل سفید ہو جاتے ہیں اور ہرا مادہ ختم ہو جاتا ہے۔
2. شدید حملہ کی صورت میں گنے نہیں بنتے۔
3. یہ بیماری اگاؤ سے برداشت تک کسی بھی مرحلہ پر حملہ آور ہوسکتی ہے۔ تاہم اگست تا اکتوبر میں بیماری کا حملہ زیادہ ہوتا ہے۔ ریتلی زمین میں کاشتہ فصل پر اس بیماری کے امکانات نسبتا زیادہ ہوتے ہیں۔

نوٹ: کماد کی فصل کو بیماریوں سے بچانے کے لیے درج ذیل اقدامات کو مد نظر رکھیں۔

• قوت مدافعت رکھنے والی منظور شدہ اقسام کاشت کی جائیں ۔
• اگر کسی کھیت میں بیمار پودے نظر آ جائیں تو اسے مونڈھا نہ رکھا جاۓ اور بیمار پودے مڈھوں سمیت اکھاڑ کر تلف کر دیئے جائیں۔
• فصلوں کا مناسب ادل بدل بھی بیماری میں کمی کا باعث بنتا ہے۔
• بیج کا انتخاب بیماری سے پاک صحت مند فصل سے کیا جاۓ ۔
• نشیبی علاقے جہاں پر پانی کھڑا ہو وہاں کماد کی فصل کاشت کرنے سے اجتناب کیا جاۓ۔

کماد کی بیماریوں کا کیمیائی تدارک

بیماری	کیمیائی کنٹرول	مقدار فی ایکڑ	طریقہ استعمال
رتہ روگ	تھائیوفنیٹ میتھائیل 70 فیصد	2 کلوگرام	سیڈ ٹریٹمنٹ کریں۔ یا پہلے پانی کے ساتھ حفاظتی طور پر فلڈ کریں۔
	کاپر آکسی کلورائیڈ 50 فیصد	2 کلوگرام	پہلے پانی کے ساتھ حفاظتی طور پر فلڈ کریں۔
	فوسٹائیل ایلومینیم 80 فیصد	1.5 سے 2 کلوگرام	مون سون کی بارشوں سے پہلے دوسری حفاظتی مقدار فلڈ کریں۔
کماد کی رسٹ یا کنگی	ایزاکسی سٹروبن + ٹیبوکونازول 50 فیصد	100 ملی لیٹر فی ایکڑ	فصل چھوٹی ہو تو سپرے کریں۔ بڑی فصل میں کناروں پر سپرے کریں۔
کماد کی برگی دھاریاں	کاپر آکسی کلورائیڈ+کاسوگامائیسین 47 فیصد	250 گرام فی ایکڑ	اسپرے کریں۔

نوٹ: کماد میں رتہ روگ کے کنٹرول کے لئے دو حفاظتی زہر پاشی(ایک بیجائی کے فورا بعد اور دوسری مون سون کی بارشوں سے پہلے) لازمی کریں۔

کماد کی فصل کا کورے اور شدید سردی سے تحفظ

کورے کے شدید حملے سے گنے کا وزن کم ہو جا تا ہے اور مٹھاس کا معیار گر جا تا ہے ۔ کورے کے حملے سے گنے کی آنکھیں بھی متاثر ہوتی ہیں اور ان کے پھوٹنے کی صلاحیت میں کمی واقع ہوجاتی ہے جس سے آئندہ فصل کے لئے بیج کے مسائل ہو سکتے ہیں ۔لہذا کورے کے اندیشے کے پیش نظر کماد کی فصل خاص طور پر بیج کے لئے تیار کی گئی فصل کو کورے اور شدید سردی سے بچانے کے لیے مندرجہ ذیل سفارشات پر عمل کر یں۔

• فصل کو آبپاشی کر یں۔
• کھیت کے گرد دھوئیں کا استعمال کر یں ۔
• کورے کے دنوں میں گوڈی سے اجتناب کر یں۔
• برداشت کے بعد کماد بلا تاخیر مل تک پہنچائیں۔

کماد کی برداشت:

کماد کی کٹائی گنے کی اقسام اور فصل کے پکنے کو مد نظر رکھ کر کر یں۔ پہلے ستمبر کاشت ،مونڈھی اور اگیتی پکنے والی اقسام برداشت کر یں ۔اس کے بعد درمیانی اور پچھیتی اقسام برداشت کر یں ۔سیلاب زدہ، چوہے سے متاثر ہ اور گری ہوئی فصل کو پہلے برداشت کر یں ۔ فصل کی برداشت سے ایک ماہ پہلے آبپاشی بند کر دیں۔ گنا کاٹنے کے بعد جلد از جلد مل کو سپلائی کر دیں تا کہ وزن اور ریکوری میں کمی نہ آئے ۔مونڈھی رکھنے کے لئے فصل 15 جنوری کے بعد کاٹیں ۔ عام طور پر دیکھا گیا ہے کہ کچھ کا شتکار نائٹروجنی کھاد کا استعمال دیر تک جاری رکھتے ہیں جس کی وجہ سے گنے میں شکر کی مقدار کم ہو جاتی ہے، اس لیے نائٹروجنی کھاد کا استعمال سفارش کردہ وقت پر کر یں ۔ گنا سطح زمین سے آدھا تا ایک انچ گہرا کاٹیں ، اس سے ایک تو مونڈھی رکھنے کی صورت میں زیر زمین آنکھیں زیادہ صحت مند ماحول میں پھوٹتی ہیں اور دوسرا مڈھوں میں موجود گڑووں کی سنڈیاں تلف بھی ہو جاتی ہیں ۔